咱是臺灣人，
來惜臺語文，
讀（tha̍k）臺語的聲氣，
讀（tho̍k）臺文的雅媠，
聽女性平凡的故事，感受自然自在的溫婉智慧，
看你我拍拚的形影，享受有情有愛的生活趣味，
寫練輕鬆的克漏字，穩固正港正範的臺語底蒂。

資深多才情的臺語人、本土語言傑出貢獻獎得主王秀容，精選十外冬的散文創作佮近期新作，配古錐、趣味有意境的插畫，集做這本臺語有聲散文集《咱來讀讀》。伊用柔情貼心的健筆，書寫女性的心思；用深刻關懷的目神，記錄你我的生活；用溫婉靜美的喉音，細說世間的悲喜。伊斟酌的筆力，豐沛的感情，入耳的聲音，誠心開講家己的人生，嘛咧破讀逐家的動靜。伊用輕鬆、親切、有文學味、媠閣趣味的臺語佮哲理，予咱有迎接未來的精神佮勇氣。

【作者簡介】
王秀容

高雄人。臺灣師範大學臺文系博士、靜宜大學英語系碩士、成功大學外文系學士。新北市五峰國中教師、臺灣師範大學臺文系兼任助理教授、公視台語台節目顧問、教育部閩南語常用詞辭典錄音、臺語配音員。

重要經歷：100年教育部推展本土語言傑出貢獻獎；104年閩南語語言能力認證專業級；102-106年教育部閱讀越懂閩客語專欄作者；全國語文競賽閩南語字音字形第一名，演說第四、第五名。教育部優秀指導員；新北市優秀輔導團員；全國佮縣市語文競賽評審、指導；閩南語認證、口語表達、創意教學、文學對譯研習講師；閩南語文本有聲教材作者、編輯、錄音；新北市閩南語字音字形工作坊成果主編。四界攏聽有伊的發音，人叫伊臺語Google小姐，伊講家己是臺語永遠的學生佮虔誠的信徒，嘛是傳播臺語媠佮趣味的蝴蝶公主。伊上愛講「若欲媠食果子，若欲巧講臺語」。2020年出版《我咧唱歌》臺語有聲散文集。

【繪者簡介】
林芸瑄

臺北人，國立臺北藝術大學美術學系畢業，在學期間是版畫組，進行個人創作、展覽的平面設計佮刊物編輯。畢業了後，專注佇插畫創作，作品繼續累積中。專長佇運用簡單的線條勾畫，閣用物件重組堆疊，拼貼出日常中的奇幻時空。